小朋友扭計?試吓 Drew Barrymore 教女嘅方法!

小朋友扭計,就算父母係荷里活巨星都無面畀!

小朋友扭計,就算父母係荷里活巨星都無面畀!身為烈女媽媽嘅 Drew Barrymore 就喺電視節目,不諱言分享自己點樣喺迪士尼,鐵起心腸,搞掂扭計嘅囡囡,而不失霸氣!

 

 

我哋從 Drew Barrymore 嘅方法,再歸納出以下應付小朋友扭計嘅攻略:

1. 當睇唔到

小朋友扭計、發脾氣,要當睇唔到,對於心軟嘅父母,有一定難度。如果你係火爆嘅父母,就更加係耐性大考驗。不過其實,當睇唔到,小朋友可以更快冷靜落嚟。等佢哋情緒唔再激動,先慢慢同佢哋溝通。

 

2. 畀啲空間佢哋

如果有人喺你發緊脾氣嘅時候,呼喝你,叫你唔好嘈,你會有咩感覺?對發緊脾氣嘅小朋友大叫大鬧,只會令情況惡化。唔好正面交鋒,畀小朋友盡情喊、叫,好好宣洩情緒。

 

3. 轉移視線

如果小朋友為咗公仔而扭計,畀本卡通書佢,畀本 pop-up 圖畫書佢。仲扭計?帶佢去圖畫角,任佢自己揀書睇。盡量將引發小朋友扭計嘅原因,轉移去其他目標。小朋友嘅注意力相當短,當佢哋分心,而你揀啱目標,小朋友就唔會再扭計。至於點樣揀目標,就要睇你平時有無做功課,留意小朋友鍾意嘅乜喇!

 

4. 保持冷靜

如果小朋友喺公眾場合發脾氣,你更加要保持冷靜。你再加把聲,只會增加噪音。而你畀嘅任何反應,只會令小朋友覺得你嘅注意力喺佢身上,而變本加厲。

 

5. 認真你就輸

有邊個父母未試過面對小朋友發脾氣?即使小朋友喺公眾場合發脾氣,都唔係真係你想像中咁無面(因為佢哋都試過!)。只要無特別影響身邊嘅人,笑住輕鬆處理,唔好令自己都發埋脾氣。

 

其實小朋友扭計、發脾氣,都係想吸引你注意力。如果你畀佢哋嘅奸計得呈,佢哋每次都會用呢招操縱你,到時就算係 Drew Barrymore 都搞唔掂!

 

有無應付小朋友扭計嘅必殺技迎喺下面留言,同我哋分享!